Keppnisfyrirkomulag á Kaupþingsmóti

Fyrir nokkrum árum var ákveðið að breyta keppnisfyrirkomulagi Kauþingsmótsins. Sama fyrirkomulag verður notað í ár. Helstu breytingarnar voru að:

• Leikir verða spilaðir þéttar, viðvera á vallarsvæði styttist en leikmínútur á mótinu haldast óbreyttar
• Lið fá fleiri andstæðinga við hæfi
• Ekki verða leiknir eiginlegir úrslitaleikir
• Ekkert lið lendir neðar en í 6. sæti

 Megin markmið Kaupþingsmótsins er að strákarnir okkar upplifi knattspyrnu á jákvæðan hátt og komi heim með góðar minningar um skemmtilega daga.  Til þess að ná þessu markmiði var farið yfir þá þætti sem helst geta dregið úr þessari jákvæðu upplifun og voru þeir helstir:

• Lið eru burstuð
• Leikir fara fram á of löngum tíma
• Krafan um árangur er ofar leikgleði

 Til að bæta úr þessu var sett upp leikjafyrirkomulag sem stuðla á að :

• Styttri bið milli leikja
• Fjölgun leikja milli liða sem eru af svipuðum styrkleika
• Aukinni leikgleði þar sem úrslitaleikir eru ekki lengur markmiðið

 Þetta nýja fyrirkomulag er þannig að öllum liðum innan liðaflokkana (A, B, C, D, E) verður skipt í sex fjögurra liða riðla sem leiknir verða á föstudag. Þau lið sem vinna sína riðla á föstudegi lenda saman í sex liða riðli, þau lið sem lenda í öðru sæti lenda saman í sex liða riðli o.s.frv. Úr þessu verða fjórir sex liða riðlar þar sem jöfn lið eru saman í riðli.  Riðlarnir bera nöfnin Íslenska deildin, Enska deildin, Spænska deildin og Þýska deildin til að koma í veg fyrir umræðu um sæti neðar en 6. 

Ein umferð í hverjum riðli verður leikin samtímis á samliggjandi völlum og einungis verður eins leiks bið hjá hverju liði. Á föstudag leika lið annað hvort frá 13:00 til 16:00 eða frá 16:00 til 19:00. Á laugardag leika lið annað hvort frá 9:00-13:00 eða frá 13:00 til 17:00.  Vegna þessa verður auðveldara að skipuleggja matartíma og sundferðir.

 Fjórar af fimm umferðum deildanna verða leiknar á laugardag og sú síðasta fyrir hádegi á sunnudag. Ekki verður um neina úrslitaleiki um sæti að ræða. Í stað þeirra verður sprell á aðalvellinum klukkan 13:00 á sunnudag og verðlaunaafhending í beinu framhaldi. Sprellið mun taka styttri tíma en 4 úrslitaleikir tóku áður og verður mótinu því lokið fyrr á sunnudeginum. 

Lagt er til við þjálfara, foreldra og forráðamenn að staða strákanna að loknu móti sé skýrð þannig að þeir hafi t.d. lent í þriðja sæti í Spænsku deildinni en ekki  í 15 sæti. Þannig lendir enginn neðar en í 6. sæti í sinni deild.